Баткен облусунда жыл башынан бери 43 685 даана акылдуу эсептегич орнотулду

31 Октябрь 2025 ж.

Кыргыз Республикасынын Энергетика министрлигинин реформаларын ишке ашыруу жана электр энергиясын жеткирүү системасын автоматташтыруу багытындагы иштердин алкагында, «Кыргызстан улуттук электр тармагы» ААКнын Баткен электр тармактар ишканасы 2025-жылдын башынан бери ири көлөмдөгү иштерди жүргүзүп келет.

Жыл башынан тарта облус боюнча 43 685 даана АСКУЭ акылдуу эсептегичтер орнотулду.

Райондор боюнча көрсөткүчтөр төмөндөгүчө:

Баткен райондук электр тармактары – 13 248 даана
Кадамжай райондук электр тармактары – 13 056 даана
Кызыл-Кыя райондук электр тармактары – 17 381 даана

Учурда Баткен электр тармактар ишканасында 128 600 абонент катталган. Анын ичинен:

119 300 — калк абоненттери,
9 500 — калк эмес абоненттер.

2025-жылга карата облус боюнча жалпы 43 685 даана акылдуу эсептегич орнотуу пландалган болсо, бүгүнкү күндө планга киргизилген (АСКУЭ) электр эсептегичтер баары орнотулуп бүттү. Тактап айтканда облустун Баткен району жана Баткен шаары толугу менен жана Кызыл-Кыя шаары акылдуу эсептегичтер менен камсыздалды.

Белгилей кетсек, бул ири масштабдуу долбоор Дүйнөлүк банктын колдоосу менен ишке ашырылууда. Анын негизги максаты — өлкөнүн энергетикалык тармагын модернизациялоо, санариптик башкаруу системасын өркүндөтүү жана электр энергиясын натыйжалуу пайдаланууну камсыз кылуу болуп саналат.

Акылдуу эсептегичтерди орнотуу — бул заманбап технологияларды киргизүү аркылуу:

электр энергиясын эсепке алуунун ачыктыгын жана тактыгын жогорулатууга;
техникалык жана коммерциялык жоготууларды азайтууга;
керектөөчүлөрдү туруктуу жана сапаттуу электр энергиясы менен камсыздоого;
энергетикалык инфраструктураны санариптик деңгээлге көтөрүүгө өбөлгө түзөт.

Мындан тышкары, акылдуу эсептегичтер керектөөчүлөргө электр энергиясын өз убагында көзөмөлдөөгө, төлөмдөрдү онлайн жүргүзүүгө жана сарптоону оптималдаштырууга да мүмкүндүк берет.